А которые патриарши и митрополичьи
и властелинские, и монастырьские вотчинные слободы и села и
деревни боярские и окольничих и думных и ближних и всяких чинов
людей вотчинные и поместные слободы, села и деревни от посадов
неблиско, а в них живут торговые люди, а изъстари они бывали
посадские жильцы, и в городех у них лавки и всякие торговые
промыслы, и по сыску, тех торговых и промышленных людей указал
государь взять в те же городы, в посад на старые их тяглые места,
и устроити с тяглыми с посадскими людми.
А будет в тех селех и в деревнях которые крестьяня объявятся
торговые, а у них в тех городех будут лавки и всякие промыслы, а
они напередь сего в посадских людех не бывали, и тягла не
платили, и тех крестьян указал государь дати на крепкие поруки,
что им впредь в лавках и в погребах не сидети и не торговати, и
варниц и кабаков не откупати, а те лавки и погребы и варницы
продати тяглым людем.
10. А выгоном быти в городех попрежнему, как к которому
городу были выгоны при прежних государех. А будет кто выгонною
землею завладел, и те выгонные земли, по сыску, у тех людей
взяти, и отмежевати к городом попрежнему.
11. А которые в городех стрелцы, и казаки, и драгуны всякими
торговыми промыслы промышляют, и в лавках сидят, и тем стрельцом
и казаком, и драгуном, с торговых своих промыслов, платити
таможенныя пошлины, а с лавок оброк, а с посадскими людми тягла
им не платити, и тяглых служеб не служити.
12. А которые в городех же иных чинов служилые люди, пушкари
и затинщики, и воротники, и казенные плотники, и кузнецы сидят в
лавках, и всякими торговыми промыслы промышляют, и им, с торговых
своих промыслов, по тому же платити государевы таможенные
пошлины, и быти им в тягле, и всякие государевы подати платити и
службы служити с посадскими людми в ряд. А кто в тягле быти не
похочет, и тем людем лавки свои продати государевым тяглым людем.
13. А которые московские и городовые посадские тяглые люди
сами, или отцы их в прошлых годех живали на Москве, и в городех
на посадех и в слободах в тягле, и тягло платили, а иные жили на
посадех же и в слободах у тяглых людей в сиделцах и в наймитах, а
ныне оне живут в заклатчиках за патриархом же и за митрополиты, и
за архиепископы, и за епископом, и за монастыри, и за бояры, и за
околничими, и за думными, и за ближними и за всяких чинов людми
на Москве и в городех, на их дворех, и в вотчинах, и в поместьях,
и на церковных землях, и тех всех сыскивати и свозити на старые
их посадские места, где кто живал напередь сего, безлетно же и
бесповоротно. И въпередь тем всем людем, которые взяты будут за
государя, ни за ково в заклатчики не записыватися, и ничьими
крестьяны и людми не называтися. А будет они въпередь учнут за
ково закладыватися и называтися чьими крестьяны, или людми, и им
за то чинити жестокое наказанье, бити их кнутом по торгом и
ссылати их в Сибирь на житье на Лену. Да и тем людем, которые их
учнут впередь за себя приимати в закладчики, по тому же быти от
государя в великой опале, и земли, где за ними те закладчики
впередь учнут жити, имати на государя.
14. А которым людем, по государеву указу, на Москве и в
городех даны загородныя дворы и огороды, и тем людем на тех своих
дворех и огородех держати в дворниках людей своих. А будет у кого
людей нет, и тем на тех своих дворех и огородех держати в
дворниках крестьян своих, или бобылей, по одному человеку на
дворе или на огороде. А будет кто после нынешняго государева
указу на тех своих дворех и огородех учнут держати многих своих
крестьян и бобылей, и тех их крестьян и бобылей по тому же всех
взяти за государя в тягло, хотя те люди за ними и в писцовых
книгах написаны.
А впредь чьи крестьяне учнут к кому приходити из их вотчин и
поместей на их загородския дворы на время для ремесленого дела на
вотчинников и помещиков, и тех людей, по сыску, в тягло не имати,
и к Москве им приходити не заказывати.
15. А которые боярские и иных чинов люди и крестьяне на
Москве и по городом покупили себе и в заклады поимали тяглыя
дворы, и лавки, и анбары, и погребы каменныя и соляныя варницы, и
торгуют всякими товары, и тем боярским и иных чинов людем и
крестьяном те тяглыя дворы, и лавки, и погребы, и анбары, и
варницы продати тяглым торговым и посадским людем, а им теми
дворами, и лавками, и погребами, и анбары, и варницами впредь не
владети, и впередь ничьим людем и крестьяном, опричь государевых
торговых посадских людей, тяглых дворов, и лавок, и погребов, и
анбаров, и варниц ни у кого не покупати. А будет впредь чьи люди
и крестьяне у кого купят тяглыя дворы, или лавки, и погребы, и
анбары, и варницы, и у них те дворы, и лавки, и погребы, и
анбары, и варницы взяти на государя безденежно, да им же за то
быти от государя в великой опале и в торговой казни.
16. А будет кто торговые и посадские люди тяглые свои дворы,
или лавки, и анбары, и погребы, и варницы напишут чьим нибудь
людем, или крестьяном в долгу в закладе до сроку, и те свои
тяглые дворы, или лавки, и анбары, и погребы, и варницы
просрочат, и тем людем кому тяглые дворы, или лавки, и анбары, и
погребы, и соляные варницы будут просрочаны, после сроку продати
государевым тяглым же людем, а самим им в тех тяглых дворех не
жити, и в лавках, и в анбарех, и в погребах не торговати, и в
варницах соли не варити никоторыми делы. А будет они после сроку
в тех тяглых дворах учнут сами жити или в лавках, и в анбарех, и
в погребах торговати, и в соляных варницах соль варити, и у них
те дворы, и лавки, и анбары, и погребы, и соляныя варницы по тому
же взяти на государя безденежно.
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89